Ushbu maqolada aniq integral tushunchasining matematika, geometriya, fizika, mexanika, tibbiyot va iqtisodiyot hamda fan-texnikaning boshqa sohalarida uchraydigan ko'pgina masalalarni yechishga tatbiqlari ko'rib chiqilgan. Yuzalar, hajmlar, yoy uzunliklari, o'zgaruvchan kuchning bajargan ishi, dorivor moddaning organizmdagi umumiy ta'siri (AUC) va iste'molchi ortiqchaligi kabi kattaliklarni aniq integral yordamida matematik modellashtirish orqali hisoblash usullari amaliy misollar bilan tushuntirib berilgan.

Ushbu maqolada amerikalik yozuvchi va ekzistensial psixoterapiya nazariyotchisi Irving Yalomning badiiy nasri ekzistensial falsafa nuqtayi nazaridan tahlil qilinadi. Yalom o'zining klinik-nazariy asarlarida ilgari surgan to'rtta "tub muammo" — o'lim, ozodlik, yolg'izlik va ma'nosizlik — tushunchalari uning badiiy asarlarida qanday obrazli ifodalanishi masalasi ko'rib chiqiladi. Maqolada "Nitsshe yig'lagach", "Spinoza muammosi", "Shopenhauer davosi" romanlari hamda "Sevishdan davolash" hikoyalar to'plami misolida yozuvchining "o'qituvchi roman" (teaching novel) deb atalgan janr tajribasi tahlil qilinadi. Tadqiqot natijasida Yalom nasrida falsafiy tafakkur bilan badiiy tasvirning uzviy bog'liqligi asoslanadi.

Mazkur maqolada xalqaro sport nizolarini hal etishda Sport arbitraj sudining (Court of Arbitration for Sport — CAS) huquqiy maqomi, yurisdiksiyasi va zamonaviy arbitraj amaliyoti tahlil qilingan. Tadqiqotda CAS tomonidan nizolarni ko‘rib chiqishning oddiy arbitraj va apellyatsiya arbitraji shakllari, shuningdek, antidoping nizolarini hal etish mexanizmlarining o‘ziga xos xususiyatlari o‘rganilgan. CAS amaliyotida protsessual adolat, sportchilarning eshitilish huquqi, arbitrajchilarning mustaqilligi va xolisligi, nizolarni tezkor ko‘rib chiqish hamda arbitraj qarorlarining yakuniyligi bilan bog‘liq masalalarga alohida e’tibor qaratilgan. Shuningdek, CAS qarorlarining xalqaro sport huquqining rivojlanishi va Lex Sportiva shakllanishiga ta’siri tahlil qilingan. Tadqiqot natijasida sport arbitrajida tezkorlik va protsessual adolat o‘rtasidagi muvozanatni ta’minlash, sportchilarning protsessual huquqlarini kuchaytirish, arbitrajchilarning mustaqilligini ta’minlash hamda arbitraj qarorlarining samarali ijrosini takomillashtirish bo‘yicha ilmiy-amaliy takliflar ishlab chiqilgan. Maqolada CAS amaliyotining O‘zbekiston sport huquqi uchun ahamiyati ham asoslab berilgan.

Mazkur maqolada agentik sun’iy intellekt tizimlarining rivojlanishi sharoitida insonning ijtimoiy mas’uliyati mazmuni va shakllarida yuz berayotgan transformatsion jarayonlar ijtimoiy-falsafiy jihatdan tahlil qilinadi. Sun’iy intellektning oddiy axborot vositasidan nisbatan avtonom qaror qabul qilish, maqsadga yo‘naltirilgan harakatlarni amalga oshirish va inson faoliyatining ayrim funksiyalarini bajarish imkoniyatiga ega agentik tizimga aylanishi mas’uliyat, erkinlik, nazorat, axloqiy tanlov va javobgarlik tushunchalarini qayta ko‘rib chiqishni talab etayotgani asoslanadi. Shuningdek, inson–sun’iy intellekt munosabatlarida mas’uliyatning subyektlari, chegaralari va taqsimlanishi bilan bog‘liq muammolar yoritilib, texnologik taraqqiyot sharoitida insonning axloqiy va ijtimoiy mas’uliyatini mustahkamlash zarurati ko‘rsatib beriladi.

Maqolada generativ sun’iy intellekt bilan bog‘liq intellektual mulk nizolarining turlari, ularni huquqiy kvalifikatsiya qilish mezonlari va O‘zbekiston sharoitida qo‘llanishi mumkin bo‘lgan hal etish mexanizmlari tahlil qilinadi. Tadqiqotda formal-yuridik, tizimli, funksional va qiyosiy-huquqiy metodlardan foydalanildi. O‘zbekistonning 2026-yil 17-avgust holatidagi qonunchiligi, Yevropa Ittifoqining AI Act va TDM qoidalari, AQSh Copyright Office materiallari, ayrim sud ishlari, WIPO hujjatlari va zamonaviy ilmiy adabiyotlar o‘rganildi. Tahlil natijasida nizolar besh guruhga ajratildi, besh elementli huquqiy kvalifikatsiya testi va bosqichma-bosqich hal etish modeli taklif qilindi. O‘zbekistonda trening ma’lumotlari, sintetik ijro, raqamli nusxa va platformalarda shikoyatlarni ko‘rib chiqish tartibiga doir maxsus qoidalarni aniqlashtirish zarurligi asoslantirildi.