Maqolada qoraqalpoq xalq dostoni "Jahonsho"da qo‘llanilgan tilning obrazliligi uchun xizmat qiladigan stilistik figuralar o‘rganilgan. Asosan dostondan olingan misollarda inversiya, anafora, kakafoniya, epifora hodisalari va ritorik so‘roqlar ko‘rib chiqildi.

Мақолада гаров эҳтиёт чораси миқдорини белгилаш мезонлари, мулкий имконият ва процессуал хавф ўртасидаги нисбат ҳамда белгиланган гаровни киритиш имкони бўлмаганда юзага келадиган оқибатлар таҳлил қилинади. Гаров миқдорини жиноятдан етказилган зарарга боғлаш ёндашуви танқидий баҳоланади. Б.Н. Рашидов, Ю.В. Царева, Т.Л. Щерба, Д.А. Лёвин, Р.Я. Мамедов, С.Н. Мальцева, Д.Р. Нариманова қарашлари, Россия, Қозоғистон ва Беларусь қонунчилиги, Европа инсон ҳуқуқлари суди амалиёти ўрганилади. Муаллиф мутаносибликнинг икки босқичли моделини ва ЖПКнинг 249-моддасига учта таклифни илгари суради: гаров миқдорининг қонуний чегаралари ва уни асослаш мажбурияти, гаровни киритиш имконияти бўлмаганда уни қайта кўриб чиқиш ҳамда гаровни ҳукмдан кейин зарарни қоплашга йўналтириш.

Mazkur maqolada Xorazm vohasida Pyralidae (Lepidoptera) oilasi biologik xilma-xilligining makoniy-ekologik qonuniyatlarini o‘rganishning nazariy va metodologik asoslari yoritiladi. Tadqiqotning asosiy yo‘nalishlari oilaning tur tarkibini aniqlash, turlarning zoogeografik areallarini tavsiflash hamda biotoplararo ekologik farqlarni baholashdan iborat. Turlarni morfologik identifikatsiya qilish, standartlashtirilgan dala kuzatuvlarini tashkil etish va zamonaviy statistik usullardan foydalanish masalalariga alohida e’tibor qaratiladi. Shuningdek, turlar boyligi, biologik xilma-xillik indekslari va ekologik omillar o‘rtasidagi munosabatlarni tahlil qilish imkoniyatlari ko‘rib chiqiladi. Tadqiqot natijalari hudud entomofaunasini tizimli o‘rganish, turlarning tarqalishini hujjatlashtirish va kelgusidagi ekologik monitoring uchun ilmiy asos yaratishga yo‘naltirilgan.

Ushbu maqolada XVIII asrda Buxoro davlatchiligida yuz bergan siyosiy o‘zgarishlar, Ashtarxoniylar sulolasining inqirozi, Mang‘itlar sulolasining hokimiyat tepasiga kelishi hamda XIX asrda “Katta o‘yin” sharoitida Buxoro amirligining tashqi siyosati zamonaviy turk tarixshunosligi materiallari asosida tahlil qilinadi. Shuningdek, Buxoro amirligining Rossiya imperiyasi, Buyuk Britaniya, Usmonli imperiyasi va Afg‘oniston bilan munosabatlari, davlat mustaqilligini saqlashga qaratilgan diplomatik harakatlari hamda mintaqaviy geosiyosiy jarayonlarning amirlik siyosiy taraqqiyotiga ta’siri yoritiladi. Turk tadqiqotchilarining qarashlari asosida Buxoro amirligi faqat yirik imperiyalar manfaatlari to‘qnashgan hudud emas, balki murakkab xalqaro vaziyatda o‘z siyosiy manfaatlarini himoya qilishga intilgan davlat sifatida baholanadi.

Ushbu maqolada Salvia L. turkumiga mansub dorivor o‘simliklarni in vitro sharoitida ko‘paytirish, biologik faol birikmalar biosintezini optimallashtirish va genetik resurslarini uzoq muddat saqlash istiqbollari yoritilgan. Dorivor mavrak turlarining biologik xususiyatlari, fenolik birikmalar, flavonoidlar, terpenoidlar va efir moylarining ahamiyati tahlil qilingan. Shuningdek, o‘simlik to‘qimalari kulturasi, oziqa muhiti tarkibi, fitogormonlar hamda elicitorlardan foydalanishning metabolitlar to‘planishiga ta’siri ko‘rib chiqilgan. Genetik resurslarni saqlashda sekin o‘sish sharoitida saqlash va kriosaqlash usullarining imkoniyatlari muhokama qilingan. Tadqiqot natijalari Salvia turkumiga mansub dorivor o‘simliklarni ko‘paytirish, biologik faol moddalar olish va qimmatli genetik resurslarini muhofaza qilish bo‘yicha istiqbolli biotexnologik yondashuvlarni umumlashtirishga xizmat qiladi.