Abstract. Mazkur maqolada imkoniyati cheklangan bolalarning badiiy qobiliyatlarini rivojlantirishda art-terapiyaning o‘rni va ahamiyati ilmiy-nazariy jihatdan tahlil qilinadi. Hozirgi kunda art-terapiya pedagogika va psixologiya sohalarida keng qo‘llanilayotgan innovatsion yondashuvlardan biri bo‘lib, u bolalarning emotsional holatini yaxshilash, ijtimoiy moslashuvini kuchaytirish va ijodiy salohiyatini rivojlantirishga xizmat qiladi. Tadqiqot davomida tasviriy san’at, rasm chizish, rangtasvir, kollaj va boshqa ijodiy faoliyat turlarining imkoniyati cheklangan bolalar rivojlanishiga ta’siri o‘rganildi. Art-terapiya mashg‘ulotlari bolalarning o‘z his-tuyg‘ularini erkin ifoda etishi, ichki kechinmalarini namoyon qilishi va ruhiy zo‘riqishlardan xalos bo‘lishiga yordam berishi aniqlandi. Shuningdek, ushbu usul bolalarda mustaqil fikrlash, tasavvur, estetik did va badiiy tafakkurni shakllantirishda muhim ahamiyatga ega. Tadqiqot natijalari art-terapiyaning imkoniyati cheklangan bolalarning o‘ziga bo‘lgan ishonchini oshirish, kommunikativ ko‘nikmalarini rivojlantirish va jamiyatga muvaffaqiyatli integratsiyalashuvini ta’minlashda samarali vosita ekanligini ko‘rsatdi. Shu sababli art-terapiya metodlarini ta’lim-tarbiya jarayoniga keng joriy etish va amaliyotda samarali qo‘llash muhim ahamiyat kasb etadi.