Abstract. Maqolada aqlli shahar transport tizimlarida sun’iy intellekt texnologiyalaridan foydalanish istiqbollari tahlil qilingan. Tadqiqotda ilmiy adabiyotlarni tizimli tahlil qilish, qiyosiy tahlil, tasniflash va ekspert-mantiqiy baholash usullaridan foydalanildi. Sun’iy intellektning transport oqimini prognozlash, tirbandliklarni boshqarish, adaptiv svetoforlarni boshqarish, jamoat transportini optimallashtirish va yo’l harakati xavfsizligini ta’minlashdagi imkoniyatlari o’rganildi. Shuningdek, O’zbekiston Respublikasida sun’iy intellekt va intellektual transport tizimlarini rivojlantirishga qaratilgan amaldagi davlat siyosati va Toshkent shahrida amalga oshirilayotgan loyihalar baholandi. Tahlil natijasida mashinali o’qitish, chuqur o’qitish, kompyuter ko’rishi va mustahkamlovchi o’qitish texnologiyalari aqlli transport tizimlarining asosiy komponentlarini takomillashtirish uchun istiqbolli vositalar ekanligi aniqlandi. Shu bilan birga ma’lumotlar sifati, raqamli infratuzilma, kiberxavfsizlik, shaxsiy ma’lumotlarni himoya qilish, algoritmlarning tushuntiriluvchanligi va yuqori boshlang’ich xarajatlar asosiy cheklovlar sifatida namoyon bo’lmoqda. Taklif qilingan konseptual model asosida O’zbekiston shaharlarida AI texnologiyalarini bosqichma-bosqich joriy etish yo’nalishlari ishlab chiqildi.