Abstract. Ushbu maqolada global pandemiyalarning til rivojiga ko‘rsatgan ta’siri lingvistik va ijtimoiy nuqtayi nazardan chuqur tahlil qilindi. Tadqiqot natijalari shuni ko‘rsatdiki, pandemiyalar davrida yangi terminlar, iboralar va kommunikativ birliklarning paydo bo‘lishi tilning leksik qatlamini sezilarli darajada boyitadi. Xususan, COVID-19 pandemiyasi ta’sirida tibbiyot, ijtimoiy hayot va raqamli kommunikatsiya bilan bog‘liq ko‘plab yangi so‘zlar hamda o‘zlashmalar jahon tillari qatori o‘zbek tilida ham faol qo‘llanila boshladi. Shu bilan birga, masofaviy ta’lim, onlayn muloqot va ijtimoiy tarmoqlarning kengayishi natijasida nutqning yangi shakllari, qisqartmalar va internet diskursiga xos til birliklari rivojlandi. Tadqiqot pandemiyalarning til taraqqiyotiga ta’siri nafaqat lug‘aviy boyish, balki semantik o‘zgarishlar, kommunikativ me’yorlarning yangilanishi va raqamli til madaniyatining shakllanishida ham muhim omil ekanligini isbotlaydi. Global pandemiyalar sharoitida yuzaga kelgan lingvistik jarayonlarni o‘rganish tilning zamonaviy rivojlanish tendensiyalarini aniqlash va kelajakdagi kommunikativ ehtiyojlarni baholashda muhim ilmiy ahamiyat kasb etadi.