Abstract. Mazkur maqolada raqamli muhitning o‘smirlarning psixologik rivojlanishiga ko‘rsatadigan ta’siri kompleks va tizimli yondashuv asosida tahlil qilingan. O‘smirlik davrining psixologik xususiyatlari, xususan emotsional beqarorlik, o‘z-o‘zini anglash jarayoni hamda ijtimoiy identifikatsiya muammolari raqamli texnologiyalar bilan o‘zaro bog‘liqlikda yoritilgan. Tadqiqotda internet va ijtimoiy tarmoqlarning o‘smirlar ongiga ta’siri, ularning emotsional holati, o‘z-o‘zini baholash darajasi, ijtimoiy moslashuvi va xulq-atvoridagi o‘zgarishlar ilmiy manbalar hamda zamonaviy psixologik yondashuvlar asosida tahlil etilgan.Shuningdek, raqamli muhitning ijobiy jihatlari axborot olish imkoniyatlarining kengligi, mustaqil ta’lim va ijodiy rivojlanish omillari bilan bir qatorda, salbiy ta’sirlari ham asoslab berilgan. Xususan, internetga qaramlik, kiberbulling, ijtimoiy tarmoqlarda o‘zini boshqalar bilan solishtirish holatlari va ularning psixik salomatlikka ta’siri chuqur tahlil qilingan. Maqolada ushbu muammolarning oldini olishga qaratilgan psixoprofilaktik choralar, jumladan media savodxonlikni rivojlantirish, raqamli gigiyena ko‘nikmalarini shakllantirish va pedagogik-psixologik yondashuvlarni takomillashtirish bo‘yicha amaliy tavsiyalar ishlab chiqilgan. Tadqiqot natijalari o‘smirlar ruhiy salomatligini mustahkamlash va raqamli muhitdan oqilona foydalanishni ta’minlashda muhim ahamiyat kasb etadi.