Abstract. Ushbu maqolada dentinogenez - ya’ni dentin to‘qimasining shakllanish jarayoni va uning murakkab biologik asoslari chuqur tahlil qilinadi. Maqolada dentinning rivojlanish bosqichlari, odontoblastlar faoliyati, genetik va epigenetik omillarning dentin hosil bo‘lishidagi o‘rni batafsil yoritilgan. Shuningdek, dentinogenez jarayonining buzilishi bilan bog‘liq kasalliklar, jumladan, dentinogenezis imperfekta, gipomineralizatsiya va boshqa irsiy hamda orttirilgan patologiyalar tahlil qilinadi. Har bir kasallik turi alohida o‘rganilib, unda yuzaga keladigan to‘qima o‘zgarishlari, klinik belgilari, diagnostik usullari va zamonaviy davolash yo‘llariga alohida e’tibor qaratilgan. Maqola dentin hosil bo‘lishidagi fiziologik va patologik mexanizmlarni solishtirish orqali klinik stomatologiyada samarali tashxis va davolash strategiyalarini ishlab chiqishda muhim ilmiy asos bo‘lib xizmat qiladi.