Abstract. Ushbu maqolada O‘zbekistonda ziyorat turizmini rivojlantirish loyihalarini samarali boshqarish, ularning tashkiliy-iqtisodiy asoslarini takomillashtirish hamda mavjud turistik salohiyatdan oqilona foydalanish masalalari ilmiy-amaliy jihatdan tahlil qilinadi. Ziyorat turizmi bugungi kunda nafaqat diniy va ma’naviy ehtiyojlarni qondirishga xizmat qiluvchi turizm turi, balki mamlakatning tarixiy-madaniy merosini xalqaro miqyosda targ‘ib etish, hududlar iqtisodiy faolligini oshirish, xizmat ko‘rsatish sohasini rivojlantirish, yangi ish o‘rinlarini yaratish hamda turizm eksporti hajmini kengaytirishda muhim strategik yo‘nalishlardan biri sifatida namoyon bo‘lmoqda. Ayniqsa, O‘zbekiston hududida islom sivilizatsiyasi, hadis ilmi, tasavvuf ta’limoti, fiqh va kalom maktablari rivojiga ulkan hissa qo‘shgan buyuk allomalar nomi bilan bog‘liq muqaddas qadamjolar va tarixiy obidalar mavjudligi mamlakatning xalqaro ziyorat turizmi bozoridagi raqobatbardoshligini oshirish uchun mustahkam asos yaratadi.