Abstract. Mazkur maqolada o‘zbek xalq shoiri Zulfiya Isroilovaning ma’naviy merosi va uning nomi bilan bog‘liq bo‘lgan Davlat mukofoti an’analarining tarbiyaviy hamda ma’naviy ahamiyati tahlil qilinadi. Shoiraning ijodiy faoliyati, ayolning jamiyatdagi o‘rni, Vatanga sadoqat va insoniylik g‘oyalarini targ‘ib etgan asarlarining ta’siri yoritiladi.Zulfiya nomidagi Davlat mukofoti — bu shunchaki mukofot emas, balki yosh avlodni ezgulikka, ijodga va ma’naviy yuksalishga undovchi ma’naviy qadriyat sifatida talqin qilinadi. Ushbu mukofot orqali O‘zbekiston yosh qizlari o‘z iqtidorini namoyon etib, Vatanga muhabbat, bilim va ijod orqali xizmat qilishga ruhlanadilar. Maqolada Zulfiya Isroilovaning hayoti va asarlarida ifodalangan ayollik, mehr, sadoqat va vatanparvarlik g‘oyalari bilan ushbu mukofotning bugungi kundagi ahamiyati o‘rtasidagi ma’naviy bog‘liqlik tahlil qilinadi. Zulfiya merosi — bu ayol qalbining sadosi, xalq ruhining ohangi, millatning orzusi va sadoqatining ramzidir. Uning nomi bilan bog‘langan mukofot esa o‘zbek ayolining or-nomusi, iste’dodi va ma’naviy kuchini avlodlarga eslatib turuvchi abadiy ilhom manbaidir.